LAD | ITA | DEU | ENG

L DRAP DLA PASCION DLA DLIEJA DA SACUN


L drap dla Pascion dla vedla dlieja da Sacun ie na testemunianza rera dla fede populera dl baroch. Cun si 400 ani y si 24 chedri iel śën cunservà, mantenì bën defin, tl Museum Gherdëina.


Tl Medieve fova i draps dla pascion unic su per curì l presbiter tl tëmp dla Curëisema y l scuender nsci ai uedli di credënc y dla credëntes. Do y do univi decurei a na maniera for plu rica y depënc cun la njonta de szenes dal Vedl y Nuef Testamënt. I univa adurvei per acumpanië spiritualmënter i credënc y la credëntes, che ne savova suvënz nia da liejer y da scrì, tres l tëmp de Curëisema y i njinië ala Pasca.
L drap dla pascion dla pitla dlieja da Sacun ie l sëul drap ilustrà tl Südtirol che se à mantenì per ntier. L ie unì crià dan n 400 ani da n artist nia cunesciù, univa mo adurvà nchin do la Segonda Viera y ie ruvà tl Museum Gherdëina a Urtijëi tl 1960.
Iló iel tl d’inviern 2001/02 unì derturà n cunlaurazion cun la Sëurantendënza provinziela Bëns culturei a na maniera che n possa ncuei l amiré te duta si belëza uriginela. L gran y rie lëur de dertureda y cunservazion ova ntlëuta descedà l nteres di esperc y dla espertes y la revista “Kermes“ ova giudicà l lëur coche ntervënt ejempler de n tiejà rer alivel naziunel. La dertureda ie oradechël unida documenteda da Paulina Moroder y Hanspeter Karbon cun n film che ie unì mustrà tla RAI Südtirol y che ie śën nce da udëi tlo clican sun l link.
Oradechël à Verena Niederegger Senoner dan n valgun ani, tl cheder de si nrescides per si tesa de laurea, studià la storia dla stampes ilustredes adurvedes dal pitëur nia cunesciù y tlarì y nterpretà i messajes dl drap dla pascion. Si scuviertes ie da pudëi liejer te n liber de 80 plates publicà n culaburazion cun l Museum Gherdëina y l Istitut Ladin Micurà de Rü. Da giapé ie la publicazion “Das Fastentuch von St. Jakob in Gröden” te na edizion tudëscia y na edizion taliana (priesc 10,00 euro). Nce sun la nterpretazion di messajes dl drap dla pascion iel unì fat n film. L link al video ie sot a chësc test.

Ëis’a nteres de savëi coche l drap dla pascion ie unì derturà? Tlo pudëis udëi la documentazion.

Ulëis’a cunëscer i sucrëc dl drap dla pascion? Tlo ie l video.

Ulëis’a liejer dl drap dla pascion? Nce chësc ie puscibl tres chësc formuler d’apusteda.


L drap dla pascion da Sacun (fotografà do l lëur de restaur y cunservazion) © foto: Museum Gherdëina
L drap dla pascion da Sacun (fotografà do l lëur de restaur y cunservazion) © foto: Museum Gherdëina
L artist ie plu dessegur da recunëscer tla figura dl capitan roman che se à cunvertì ala nueva religion, da udëi ora tl 17ejim cheder sot ala crëusc, che se stiza sun blason simbul di artistc.
La persona o persones che à nciarià de fé l lëur possun recunescer tl 20ejim cheder tla trëi figures (a man ciancia) furnides aldò dl Siescënt danter la puer’anes dl purgatuere.