LAD | ITA | DEU | ENG

Ëiles de Gherdëina tl’ert dl ziplé

(4a pert)


Stories de ëiles de Gherdëina tl ert dl ziplé - Zipladësses de Sëlva

Tla prima trëi edizions ve ons cuntà dl pruiet de nrescida y documentazion tl ert dl ziplé dl’ëiles te Gherdëina che à coche fin de valorisé deplù l lëur dl’ëila y si rodul te familia.
Tres la ntervistes di ultims mënsc pudons śën mustré su cun na bela cumpëida de testemunianzes de passa 40 persones danter ëiles y ëi, che ti dà la mpurtanza che les se merita.
Da liejer do sun www.museumgherdeina.it y tla Usc di Ladins.
1a pert
2a pert
3a pert

Te chësta cuarta pert ve presentons trëi zipladësses de pitla figures, zbergli y angiuli de Sëlva da pludagiut y da śën.
Senoner Katharina (anda Trina) che zipla da jëuna
Senoner Katharina (anda Trina) che zipla da jëuna

Senoner Katharina de Cësanueva, marideda Senoner dl Ploc, Sëlva

Anda Trina cumplësc ncuei ai 20 de agost 99 ani y nchin 90 ani àla ziplà.

Te chësc articul cuntons dla memories de anda Trina y si lëur


Ël fova n bon “Künstler“ dij anda Trina de si pere Śepl. A ziplé iela ruveda tres ël, ëila à for ulù ziplé.
Sun l luech da Cësanueva fova si pere chersciù su, ël fova restà fi sëul, si fredesc fova duc morc da pitli. Po ovel maridà Tresl de Col, ëila ova 20 ani, ël n òva 24.
Trina ie nasciuda ai 20 de agost dl 1922 coche la plu vedla dla familia, do ëila n iel mo nasciui ot.
Tone si fra, ie tumà tla viera, l ova mé 19 ani y l fossa stat scialdi n bon de ziplé.
A scola ie anda Trina jita te Sëlva y daldò àla mo fat doi ani de scola d’ert.
L prim ann de scola de ziplé òvela coche maester Hans Delago y l segondo ann bera Luis Senoner de Ronch. Chëi che jiva l terzo ann òva bera Albino Pitscheider, chëla fertuna ne n’àla nia abù al avëi coche maester dijela. Nsci àla mparà a ziplé y modelé da chisc doi maestri, ma l fova nce ëures de talian, iló fòvel na maestra taliana.

Do avëi finà la scola àla po scumencià a ziplé a cësa, te stua cun si genitors y Tone.
Tl prim messovela fé lana ala biesces, ma iló la bruntlovi ajache la ti fajova massa de burta lana.
Po àla scumencià a ziplé mandli dla cripl, chël àla mparà da si andes Lisa y Carlina sun Col a jì te Val, les fova pa feter sciorfes cun ch’l ziplé! Y ntant iel unì la viera y l ne fova nia plu da lëur.
Trina se lecorda mé che a chëi tëmps fajovela for ciauza y de tei cër’ lëures, ëila fova la plu vedla de tanc y messova judé dut ntëur y fé stroc de cësa, ntan che l’oma ziplova. A si oma anda Tresl ti savovel bel a ziplé, la ziplova d’uni sort de tieres.
Ma a Trina ti àl ënghe for sapù bel a ziplé. I prims ani fajovela mandli dla cripl y ngali àla scumencià a ziplé de tei pitli zbergli de 8-10 cm. Iló adurvoven zirm y l lën giapoven dala chemun sce n dajova ite.
Duc ziplova da d’ëi a cësa, genitors, fredesc y surans y uniun fajova figures defrëntes. L pere mé per dì fajova scialdi de biei tieres, ciamorces, cërves y tieres dla cripl, ël ti vendova a mez Urtijëi, contela. Dan Nadel univa for i ferlëigheri a mené do, po messoven pa feter se spazé y per davanië jivela mefun bën de sté pra l lëur. Laurà univel danz for do cëina nchin la 10, po dijova l pere: „jide a durmì śën“.
La sades jiva Trina a vënder i tieres che si pere y oma òva ziplà ora Soplajes y a Urtijëi, datrai univi nce ëi nstësc a se i tò.

I scioldi messovi duc canc dé ju, cieche jiva debujën cumprova i genitors, ëi pudova marciadé tl priesc. Ora Pigon jivi ënghe a vënder, iló giapoven na zedula cun chël che n ova da avëi y do che n òva cumprà ite chël che n adurvova iló te chëla butëiga univel fat via.
D’instà messova po duc judé a lauré da paur; te stala, te ciamp, a tré bagoc y truep d’autri lëures fòvel da fé. Ëi òva nce truep bestiam; vaces, biesces y cëures y n gran ciamp da sejelé cun orde, siela, patac y reves.

Maridà se à Trina nia dalonc da cësa, mé te una na cësa plu invìa iela ruveda, tla cësa dl Ploc. Si uem Luis fova de 12 ani plu vedl che Trina, ëi se à lascià dé adum tert d’autonn dl 1947.
Bera Luis fova l plu vedl de cinch mutons, si pere Franzl dl Ploc fova tumà tla Prima Gran Viera che ël òva mé sies ani y si oma Stina òva messù tré su chisc mutons, lauré da paur y jì te stala dut dassëula.
La jocera de Trina, anda Stina, à vivù duta la vita deberieda cun ëi te cësa, ëila à for judà ce che la fova bona. Trina pudova ziplé y lava à for cialà sun si sies mutons nchin che la ie unida viercia y monce iló fajovela ciauza. L fova n’ëila scialdi valënta.

Scebën che Trina à laurà dassënn, o massa, coche la dij, àla mpo mo abù bel.
Vel’mueia ne ti ie nia unida sparanieda coche canche l ie morta si muta Clotilde cun 57 ani.
Ma zënza ti ál for sapù bel tla vita y la ie for stata nton.
Pona àla for butà ti diji ie y ëila me respuend: “scenó ne fossi tan vedla!“
Trina te stua dan si zbergli
Trina te stua dan si zbergli
Zbergli ziplei da anda Trina
Zbergli ziplei da anda Trina
Zbergl ziplà da anda Trina cun 90 ani
Zbergl ziplà da anda Trina cun 90 ani

Mussner Sophie da Guton, vëidua Senoner, Sëlva

Zipla mo for de blòt angiuli
Sophie da Guton ie nasciuda dan belau 90 ani, ai 29.9.1931 te Sëlva.

SCOLA
Chersciuda su ti tëmps riei dl fascism, òvela abù i prims doi ani de scola mé talian, dadedò àla nce mparà tudësch. L fova plutosc de stleta scoles urganisedes melamënter, dijela.
Tl 1939 fovel la opzion, n messova lité sce resté o se n jì.
Ntlëuta ne fovel deguna scola mesana y do che la fova stata cater ani for pra l medemo maester bera Zenz Delago jivela gën a fé la “Fachschule”, ma plucheauter per mudé scola y bën nce ajache duc i autri jiva.

SI AVA BARBL
Si lava anda Barbl da Guton (Valin) ova abù doi mutans, Maria y Mena. Maria fova dl 1905, Mena dl 1906. L fossa mo stat doi jumblines, ma chëles fova mortes.
Anda Barbl fova resteda vëidua da jëuna, si uem fova mort cun 45 ani dal crëibes.
Ëi ova n gran luech da paur, ciamps ora per ch’la rives y n pra da mont sun Juac, ma ajache si uem se ova amalà y ne fova nia plu bon de lauré, messova Maria, la muta de mé 10 ani, purté su la luesa da corni sun Juac per jì a fën. Juvier univel pona ël. Maria, oma de Sophie, ova me 10 ani che si pere fova mort.

SI OMA MARIA
Si oma Maria da Guton fova na bona de ziplé, ëila ova mparà dal nëine bera Valantin Senoner de Burdenjëia, che fova scialdi n bon de ziplé.
Si oma ti ova cuntà che lava Barbl l’ova mandeda a Bulsan a scola, tl Elisabetinum, ma ëila ne ulova nia ste iló. L ti savova tan burt dala munighes y sce la ne pudova nia unì a cësa, se n fossela muceda da śolder ju.
Maria ova po scumencià a ziplé, ëila ziplova mpue dl dut. La ziplova scialdi a chëi dl ANRI, roba bëndebò granda, la fajova de biei pec.
L’oma dijova che sce la ziplova datrai a chëi de Pigon, po messovela nce jì iló te butëiga a cumpré ite, po restovel mé plu puec scioldi. Ma la ne se nfidova belau nia a nia cumpré iló. Ëi ova nce stofs y l’oma savova da cujì. La ti fajova dut cant a si mutons. L’oma fova na bona lauranta, sparaniënta y la ova na bona man. Y la bona man à Sophie arpà.

SOPHIE
Anda Sophie ie me jita doi ani ala „Fachschule“. Ëila ulova nce me sté a cësa y scumencé a ziplé. Mparà àla da si oma bele dan jì a fé la scola. Iló ziplovela bele de tei pitli mandli che la ti fajova do, ma me de mëndri.
Sophie ova po nce giapà modiei da chëi dl ANRI da ziplé do, modiei che bera Albino Pitscheider ti fajova. Ma tla scola de ziplé ne iel nia stat si maester. Si maestri tla "Fachschule" fova l prim ann bera Luis Insam de Romano y l segondo ann Adam de Col da Larjac.
Ce legrëza che la ova po abù a scumencé a ziplé per la firma ANRI. Tl prim òvela giapà da fé de tei pitli conici, ntlëuta ti purtovi nce l lën y la davaniova una lira l’un.

A cësa sa Guton ziplova Sophie for nchin la 10 dassëira. Che la fova per se maridé cun 30 ani cun Engelbert Senoner de Burdengëia òva si oma dit: “stà pa pu mo d’instà a restlé“ che l foss tan stat debujën de n’ëila. Si surans Babi (Barbara) y Mena (Filomena) se ova maridà plu da jëunes. I cuniëi de Sophie ne pudova danz nia judé d’instà davia che i jiva ora l ANRI a lauré.
Dan maridé ziplova Sophie a deplù ferlëigheri te duta la valeda. L fova scialdi da lëur ti ani ‘50-‘60 y canche i univa adalerch ti tulovi belau l lëur ora dla mans.
Daldò àla mé plu vendù a jënt da tlo. A patins ne n’àla mei drë’ ziplà. Ëila à ziplà mpue dldut, ma dantaldut angiuli y cëves d’angiuli. Chi putti ziplovela da fonz ora, i ultims ani i giapovela desmazei a mascin, datrai nce tl lën de zirm y vendui univi coche fac a man. N messova sambën i ziplé sëura dut, sciche sce i fossa unìi ziplei de fonz ora.
Ntlëuta davaniova na zipladëura bona y asvelta de biei scioldi. Plu tert à i ferlëigheri scumencià a davanië truep.
“Canche i ova njinià la mascins ora l ANRI ova l pere dit che l messëss unì ju na bomba y bater ntoc dut”. Ël udova bele danora che chël fossa stat la fin dl ziplé … y śën ai nce finà“, dij Sophie.
Anda Sophie à ënghe ziplà do y dij che sën sul dedò fossel stat bel y saurì sce n ëss pudù lauré y ziplé do la roba desmazeda. N ëssa giapà l lën y n ëssa me plu messù se senté ju. Ma nianca chël ne n’iel plu.

SI PERE TONE (Anton) DE BETIT
L pere Tone ie chersciù su sun Betit (mesa cësa fova Betit y mesa cësa fova Ploc, ncuei dlongia la Pension Daniel). Ël fova l sëul mut cun trëi surans che fova restedes da maridé. Si genitors fova morc dan che si pere se maridëssa. Doi surans fova restedes sun l luech y ël ova maridà Maria che fova patrona dl luech da Guton (Valin) y nsci fovel ji a sté iló. A chësta maniera òvel doi luesc da lauré, Guton y Betit y n pra da mont sun Ciavazes sota l jëuf dl Sela.
Ma l òva nce na bona man, ël fajova lueses da corni, lueses da slusé y les cunciova nce su. Ël fajova nce sieves y lëures da marangon.

TE BERSTOT
Sophie à mo for si berstot jubas cun si penic, si scarpiei, si „Schnirlscheibe“, na pitla mola a sut. Da ti dé l uedl, davia che la bruja i scarpiei, sce te druches massa lessù. Y l snirtl, cërc ti dij la mujiga, ulache n tira ju i scarpiei do che i ie amulei y aguzei. Chëla se òvela fat tl 1979.
I scarpiei ie ënghe finei, chëi se òvela njinià canche la ova scumencià a ziplé, y la à pa laurà 70 ani limpea. I manesc ie mo uriginei, chëi ti òva turnà si fra Giuani.
Sophie à dansù n perstuech de pel a ziplé, ëila me conta che chësta pel che la se ciola dansù, àla arpà dala jumblines Giudita y Trina tl Scizer, ajache Sophie jiva unitant a ti amulé i scarpiei. Duta doves ziplova, les fajova de tei pitli cians.

„Y chësc blòt angiul che vëije tlo dan me, ëis vo desmazà?“ ti damandi.
„Chësc ei fat ncuei ora de n tel tapl. Ma l ie n lën tan stlet, sën iel propi na galia“. „N ne giapa nia plu de bon zirm sciche l fova plu da giut, canche n messova jì a se taië l lën“.
Po laurëis for mo gën? damandi inant. “Sci l me sà for mo bel, ma mé plu per passatëmp. Scenó feji scialdi ciauza, chël me sà drë’tan bel, iló possi sté te stua“.
Sophie me lascia udëi de plu de chisc blòt angiuli che la à ziplà y che la tën te ciauzela y po vàla mo a tò n angiul ziplà tl sas dur. La me conta che canche fova unida ju la smueia da Insom tl 1951, n ueia de Pasca, fova un de si fredesc jit a udëi l gran spavënt. Ël ti ova purtà adalerch n tel tòch de sas blanch che fova tla smueia y ëila òva pona ziplà n blòt angiul dainora n lecurdanza dla burta ntraunida y rissà ite la data 19.04.51.
„Vo ëis propi na bona man“, ti diji.
„Chël ei arpà de bon” me respuendela.
Sophie da Guton zipla mo for
Sophie da Guton zipla mo for
Angiuli ziplei da Sophie da fonz ora
Angiuli ziplei da Sophie da fonz ora
Anda Sophie pra penic
Anda Sophie pra penic
Angiul desmazà da anda Sophie
Angiul desmazà da anda Sophie
Amulé cun la mola a sut
Amulé cun la mola a sut
Angiul ziplà tl sas da Sophie
Angiul ziplà tl sas da Sophie

Elisabeth Pitscheider, marideda Senoner de Santuel, Sëlva

(2.4.1899-11.2.1997)
Na landa che à fat truep

Milia Rabanser, la mëndra de diesc mutons dla familia de Santuel, nasciuda dl 1939 me à cuntà de si oma Lisabeta che ie ruveda a 98 ani.


Oma ova gran legrëza a ziplé. Ëila à ziplà nchin a 90 ani. Nce canche la ne n’ova plu nia da fé ti purtova l fra de Milia zeche per pudëi se tripé. Chël fova l plu bel, jì pra penic y ziplé. D’instà fovel da lauré da paur, iló ne pudovela nia, ma d’inviern ti savovel l plu bel sté pra penic. Ziplé ziplovela veramënt cun cuer.

A Persenon dala “Englischen” l’òvi mandeda a scola, ajache Lisabeta ëssa abù l talënt per studië, iló fóvel na si anda che fova jita muniga te n cunvënt. Ma l ti nchersciova tan dassënn che l segondo ann ne n’àla nia plu ulù n savëi y à dit che la uel mparé a ziplé. Y nsci àla fat la scola de ziplé te Sëlva. L fova chëi ani ulache l fova maester bera Albino Pitscheider.

Oma fova de Santuel, l fova doi mutans sun l luech. L uem Eduard Senoner dla Tinderla fova de Urtijëi, Lisabeta fova si segonda fëna. L pere se ova maridà l prim iede cun la sor Cristina che fova la plu vedla, iló iel nasciù n mut y diesc dis do iela morta. Po àl maridà la sor, iló iel nasciù nuef mutons, doi ie morc da pitli y un cun 11 ani. L preve, Seniëur Giuani fova mut dla prima fëna.

L ie stat na fertuna che l fova lava te cësa che judova a fé i lëures de cësa y che cujinova nchin 15 dan che la ie morta cun 87 ani. I fova mpo de diesc te familia. Tres si aiut à l’oma for pudù ziplé d’inviern. Ziplà àla n pue dldut, cëves da mëter su i corchi, tieres, cians, biesces y d’uni sort de figures.
D'inviern ti turnova l pere i cëves de corchi. Sun l luech da paur che fova scialdi grant ne univel scenó nia a frida a fé deplù. L’oma judova dut l d’instà a lauré da paur y chël dassënn.

Ëila à for ziplà te stua y do avëi laurà duta l’ena jivela la sada danmesdì a vënder. Domesdì tulovela ca la mascin da cujì y ti fajova na brea o n guant ai si mutons. La fova tan asvelta che la dumënia pudovi bele se l tré sëura, danz che la cujiva nchin tert de nuet.
Y ntan che la ziplova ti dijovela for a si mutons: “lijëme dant la zaita, ie posse scuté su y ziplé y a vo ve fejel bon”.
Canche i fova pona majeri, l pere òva mandà belau duc i mutons almanco un n ann demez a scola, ajache ël dijova for: “n pue maië pan fulestier fej bon a duc”. Purempò à un ndolauter ulù scumencé a ziplé, mé Milia nia, y ora dl stalot dal purcel ài pona fat na berstot.
Milia à de biei lecorc dl instà, chël fova l plu bel tëmp, ajache iló ne ziplovi nia dassëira, iló univa ca i ujins te cësa y l univa ciantà y sunà.

Milia conta inant che nce la surans Maria y Burgl ziplova madones stilisedes, angiuli, bambins de Praga y mo d’autra roba. La sor Burgl che ie morta cun mé 60 ani òva maridà l paur dl Tina te Sëlva y òva abù cinch mutons. D’inviern ziplovi dui doi, uem y fëna, iló sci che i manteniva la familia cun l ziplé che a lauré da paur fòvel plu rië a tré l viver.

L fra Martin, che à pià do l luech de Santuel, turnova ntan la sajon da d’inviern, si fëna Frieda depenjova.
L fra Franzl à ziplà nchin 90 ani, si lëures ie ruvei sëura dut l mond, ël ziplova de gran figures y stazions. I ultims ani iel ruvà tla Cësa de Paussa a Urtijëi, Milia jiva suvënz a l crì, ël ova for l gurmel brum sëura y unitant ti dijòvel: “duman vedi pa bën ju n berstot a ziplé”.
Bera Fanzl à nce publicà n liber cun si memories, ël ie mort tl 2020.
L mënder fra Emerich ie ënghe jit ala scola de ziplé, ma po iel zapà ite tl ciamp dl turism.
Ce fertuna ntlëuta, duc pudova sté a cësa y ziplé, l plu bel mestier!, dij Milia.
----------------

D’autra ntervistes y biografies de ëiles scultëures y zipladësses de crisc’, mandli dla cripl, madones, angiuli, reliefs, pitla figures, caricatures, tieres, bambi, juesc y mo truep d’auter unirà publichedes do y do.

L nes fajëssa sambën plajëi sce l fossa mo zachei che nes cuntëssa velch de sé o de si oma, sor, anda, ava o besava, Tulon gën su inant nfurmazions o fotografies da pudëi ntegré a chësta nrescida.
Son a despusizion al numer de telefonn dl Museum Gherdëina: 0471 797554 o tres email a: info@museumgherdeina.it


Per l Museum Gherdëina, Monika Kelder

Anda Lisabeta de Santuel
Anda Lisabeta de Santuel
Figures zipledes da anda Lisabeta
Figures zipledes da anda Lisabeta
Figura zipleda de Lisabeta Santuel
Figura zipleda de Lisabeta Santuel
Figura zipleda de Lisabeta Santuel
Figura zipleda de Lisabeta Santuel