Prugram speziel 2016

Premiere mundiela „Mostra de fossìi dl Sud dla Cina“

Giaurida: lunesc 27.06.2016, dala 20.30 (t foyer dla Cësa di Ladins)
Dureda: 28.06 nchin ai 27.07.2016 (entreda debant)

---

Vijita meneda tres la mostra de fosii y jita geologica te Val d’Anna
cun i scuvridëures dl itiosaur de Secëda Johann Comploj y Meinhard Strobl
Terminn: 06.07. y 20.07.2016 (dureda ca. 3 ëures)
Luech d’ancunteda: 9.30 tl museum

Vijita meneda tres la mostra de fosii y jita geologica sun Secëda
cun l paleontologh Pruf. Andrea Tintori, Università de Milan
Terminn: 27.07.2016, escurscion de mez n di

Nfurmazions y iscrizions tla lies dl turism de Gherdëina y tl museum
(Sce l pluev vijita a puntin tl museum)


Vijita meneda tres la mostra de fossìi cun n espert
Uni juebia ntan l mëns de agost, dala 16.30 (tla rujeneda tudëscia, dureda 45 menuc)

---

Gherdëina s’anconta cun la Cina: per l prim iede te na mostra fossìi de pësc y saurs dl Triassich dala Cina

Parenteles geologiche danter la Dolomites y la Cina dl sud: na mostra straurdinèra dal 27 de juni inant

Dan milions de ani fova la Dolomites y la Cina dl sud sperses tuchedes dala spuendes dl medemo mer preistorich dla Tetide (Tethýs). Tan strënt che ie chësc liam geologich y paleontologich danter la Dolomites & la Cina, de chësc possun se rënder cont te na mostra dl dut particulera nvieda via dal Museum Gherdëina en culaburazion cun la Union di Ladins de Gherdëina y che sarà da udëi tl foyer dla Cësa di Ladins a Urtijëi dal 27 de juni inant. Per l prim iede vëniel mustrà tl uzidënt na cumpëida de fossìi unics y spectaculeres unic a lum pra giavedes tla Cina dl sud. Tla esposizion pësc y saurs marins dl Triassich.

La ravises geologiches ulache nosta Dolomites s’anconta cun la cuntreda dla Cina dl sud va ndëur de zira 240 milions de ani. Tla Dolomites y te Gherdëina se àn dat ju cun l stude geologich de chësta vëtes bele ti ani ’50, ntan che tla pruvinzies de Guizhou y Yunnan an permo dan n 15 anni incà scumencià a purté a lum n patrimone damat rich cun milesc de fossìi scialdi bën cunservei. Śën ann ucajion de se rënder cont dla doi tuedes paleontologiches ti doi raions deferënc. L Museum Gherdëina tla Cësa di Ladins a Urtijëi, che te si culezion permanenta cunservea bele fossìi y curëc de valor unich dl raion ntëur Gherdëina ite, ie nsci deventà n hotspot, n’ atrazion cunesciuda pra i paleontologs da dut l mond.

Dal 27 de juni al 27 de lugio ruva tlo lepro passa 30 fossìi dla faunes triassiches plu antiches dla Cina dl sud: n pudrà amiré na bela cumpëida di retìi marins y pësc, da n valguni lonc passa n meter a tei pitli de iusta 3 zentimeter. A Urtijëi iel po’ nce da pudëi ti cialé ai plu vedli pësc che julova. “L nes fej sambën legrëza che chisc fossìi dala Cina auza ora l’mpurtanza dl patrimone paleontologich de Gherdëina y che conservon te nosc Museum da passa 50 ani” sortissea la diretëura dl Museum Gherdëina Paulina Moroder. A nivel de studi paleontologics possa la interazions danter i doi raions cun si sic da vëtes riches de curëc y fossìi miuré nosta cunescënza dl’evoluzion dla vita marina dl Triassich.

La esposizion straurdinera ie unida a se l dé per merit dla culaburazion che l Museum Gherdëina porta inant da cinch ani incà cun l professëur Andrea Tintori, paleontologh de Milan che à analisà y studià a puntin la scuviertes reres de pësc ora dla vëtes de Pic y Secëda. Ël ie nce un di respunsabli dla giavedes tla Cina dl sud. “Chësa bela cuoperazion ie per nëus na ucajion per strënjer nosc liams y nosta presënza a nivel internaziunel y unì tëuc ite nsci te na rë scientifica straurdinera”, auza ora Moroder.

L’ esposizion “Pësc y saurs dl mer dala Cina dl sud” ie metuda a jí dal Museum Gherdëina en culaburazion cun la Universiteies de Milana y Pechin y cun la Union di Ladins de Gherdëina, y l sustëni da pert dla Regione Trentino Alto Adige, dla Furnadoia Seceda Spa y di Chemuns dla valeda. La mostra vën inaugureda a Urtijëi en la sëira dl 27 de juni y ie da udëi nchin ai 27 de lugio.

---

Iniziativa realiseda dal Museum Gherdëina en culaburazion cun l Prof. Andrea Tintori (Università de Milano), la Peking University, la Nuova GeoTeAm y La Union di Ladins de Gherdëina.
Sention gra per l sustëni: ala Furnadoies de Seceda, al’Ufize per la Mendranzes linguistiches dla Region Autònoma Alto Adige/Südtirol, ai Chemuns de Gherdëina, l Cunsei de Furmazion de Urtijei, le Associazioni turistiche della Val Gardena, l Istitut ladin Micurà de Rü.
L buffet dla giaurida vën pità dal Hotel Genziana (fam. Bernardi) y dal Café Adler de Angelo Ploner.

---

Mostra de pësc y saurs dl Triassich dala Cina dl Sud: paleontologhes cinëisc en vijita tl Museum Gherdëina

Studiëusc dl’Università di Pechingh a Urtijëi: “I fossìi dolomitics nes dà n cheder plu ntier.”

16 de lugio 2016

Comunicac stampa