"MEJES - La memoria de na cuntreda" tla Cësa de Cultura a Urtijëi

Orars de giaurida dla mostra:

Instà
05.08.19–30.09.19: lu–sa 15–18, du 10–12.30

Inviern
01.10.19–30.11.19: ju 15–18, ve+sa 10-12.30
01.12.19–07.01.19: me–ve 15–18, sa+du 10–12.30, 15–18
07.01.20–23.02.20: me–ve 15–18, ve+sa 10-12.30

01+02.11, 24+25+31.12., 01.01.: stlut

Vijites menedes per grupes sun dumanda nce ora de orar.

Ntant dut l tëmp de dureda dla mostra uniral pità n prugram nteressant cun
vijites menedes tematiches tres la mostra, jites ai mejes, ancuntedes y
dialogs, cunferënzes, azions per families y n workshop sun la fotografia de architetura.

--------------

Proiet "Mejes" per la valorisazion y l mantenimënt di mejes storics

Ntujiasmé per la belëza y l valor di mejes storics y tl medemo tëmp ti pité aiut a si patrons per i mantenì: Chisc ie i traverc dl proiet „Mejes de Gherdëina – La memoria de na cuntreda“ che se basa su na idea dl architët Wolfgang von Klebelsberg, la cherta di mejes dl Museum Gherdëina y fotografies de Václav Šedý. L proiet dl Museum Gherdëina ie pià via cun na lingia de ancuntedes cun patrons nteressei, representanc dla lies di paures de Gherdëina, dla cultura y dla politica.

I mejes: testemonianzes che conta di cënc ani de storia de nosta cuntreda

Da cënc d’ani ani incà caraterisea i mejes la cuntreda culturela de Gherdëina, la plu vedla cëses da paur che se à mo mantenì ie dl tredejejim secul. Ma scebën che i mejes ie architetonicamënter unics tla cuntreda y de gran valor storich per la valeda scumparësc chisc vedli luesc da paur do y do. La rejons ie la mudazions economiches y sozieles, ma nce la deficulteies y la cëria finanziela canche la va de adaté la vedla cëses y tublëi ai bujëns dal didancuei.
Chësc svilup ie plutosc festidient: di 540 mejes y di 487 tublei documentei sun la cherta di mejes dl Museum Gherdëina curespuend ncueicundì manco de n terzo ala cundizions dl patrimone uriginel. Cun uni vedla cësa da paur o vedl tublà che vën trat ju o spustà sfantel n toch de storia culturela de Gherdëina y chësc ie na perduda definitiva per la valeda, si abitanc y si cultura materiela.

Crissa de soluzions cun patrons y autoriteies

Per crí alternatives a chësta sanlasceda à l Museum Gherdëina, n culaburazion cun l architet Wolfgang von Klebelsberg, che ie spezialisà sun l mantenimënt de frabicac storics, metù a jì l proiet „Mejes – La memoria de na cuntreda“ che vën sustenì dai chemuns de Urtijëi, Santa Cristina, Sëlva y Ciastel y dala Region Trentin-Südtirol, dala Repartizion Cultura ladina, dala Cassa Raiffeisen de Gherdëina y dala Fundazion Cassa dl Sparani de Bulsan. “Ulon ti mustré ala jënt de Gherdëina ce richëza che i mejes reprejentea” tlarësc i respunsabli dl proiet. “Perchël ulons nce mustré su i problems ogetifs che se porta pro pra l mantenimënt di mejes y cialé de crì troies puscibli tl dialogh danter patrons y autoriteies.”
Purté pro a na bona culaburazion danter la istituzions cumpetëntes per l’agricultura, la cultura y la scunanza di bëns culturei, i esperc dl mantenimënt dla frabiches storiches y i patrons de chësta frabiches ie perchël una dla trëi seves dl proiet. “Rujenan i uns cun i autri dëssel unì mustrà su soluzions per l mantenimënt y puscibilteies de alesiramënt“, tlarësc l Museum Gherdëina.

Mostra itineranta y catalogh

La segonda seva dl proiet ie na mostra cun fotografies a blanch y fosch dl fotograf d’architetura de Milan, l cunesciù Václav Šedý. Ti mënsc passei àl vijità ntëur 70 mejes storics te duc i cater chemuns de Gherdëina y à fotografà aspec architetonics y dl paesaje, crian imajes de marueia dla belëza dl’architetura da paur storica. Per Václav Šedý mpermët la rapresentazion dla forma architetonica tla fotografies de fé luné ora l valor estetich y storich, purempò iel tler per Šedý che la imajes ne dëssa nia sostituì te nosta cuscienza i mejes nstësc ajache si nravisamënt tla cuntreda ie fundamentel per la identità culturela.
La prima tapa dla mostra itineranta che vën realiseda cun l “studio exhibit” de Vienna, unirà giaurida ai prims d’agost tla Cësa de Cultura a Urtijëi. La fotografies sarà po da udëi iló nchin al scumenciamënt dl 2020, canche la mostra jirà inant si streda tres l’Elpes y pra i Politecnici nteressei.
La mostra sarà acumpanieda da n catalogh te cater rujenes tla forma de n bel liber d’architetura ilustrà che unirà publicà dal editëur renumà de Milan “Officina Libraria”. “Cun chësc catalogh dëssel unì adressà n publich mo plu lerch che vën tëut ite a pensé do sun l daunì dl’arpejon di mejes da paur te Gherdëina y plu n generel te dut l raion dla Elpes”, dij la diretëura dl Museum Gherdëina Dr. Paulina Moroder.

Revalutazion y cunscidrazion

Ala fin dla finedes vala pra l proiet “Mejes de Gherdëina – La memoria de na cuntreda” de avisé l’atenzion de viers dla richëzes cultureles, architetoniches, etnografiches y archeologiches che ie njupedes ti vedli mejes. “I mejes ie na sort de archif storich y demografich tridimensciunel dl nridlamënt dla valeda” dij l architët Wolfgang von Klebelsberg. Perchël dëssa na cumpëida pusciblmënter granda de persones unì sensibiliseda per si mantenimënt y chël nia mé tres nrescides scientifiches ma nce tres n azes visuel-emoziunel. “Cie che nes stà a cuer”, dij chi che mët a jì l proiet, “ie na cunscidrazion dl valor culturel y tl medemo tëmp dla problematica dut ntëur cumplicheda ma de gran atualità storich-culturela.”

Per deplù nfurmazions:
Dr. Paulina Moroder
Diretëura dl Museum Gherdëina
Tel. +39 338 6040477
E-mail: p.moroder@museumgherdeina.it

Arch. Wolfgang von Klebelsberg
Architet
Tel. +39 335 5457580
E-mail: wolfgang@vonklebelsberg.it

Comunicat stampa Proiet „Mejes“