Mëisa turonda:
Cunté y dé inant la storia - Lecorc ntëur al tëmp dla generazion dl ‘68
Vënderdi, 19 de utober dala 20.00tla mostra LUIS PIAZZA / RAIMUND MUREDA
Cësa de Cultura de Urtijëi
Tla mostra speziela dedicheda a Luis da Cudan y Bera Raimund tla Cësa de Cultura a Urtijëi, vëniel metù a jí cun i mutons di doi artisć - Leander Piazza y Manfred Mureda, tramedoi nstësc jic la streda dl’ Ert -, na mëisa turonda sun l muvimënt di jëuni dl ´68.
Do la presentazion de fotografies y de n toch de mujiga che fej sentí ora l’ atmosfera revoluzionera de chëi ani, nes cunterà Leander y Manfred - deberieda cun d’autri ghésc nviei ite - de si esperienzes vivudes da jëuni tl ambient tradizionel dl luech y oradecà, y jirà ite sun la dumandes dl publich.
Pian via dala testemunianzes y dai lecorc persunei uniral rujnà dla trasformazions che nosta sozietà moderna a fat tres su per i ani 60’ y ’70 a nivel economich, politich, soziel y culturel, coche nce tla relazion danter ëi y ëiles, mutons y genitoresc. L ne mancerà nia l cunfront cun l tëmp d’aldidancuei.
Ghèsc dla mëisa turonda: Leander Piazza, Manfred Mureda, Egon Moroder Rusina, Gregor Prugger, Markus Schenk, Gretl Senoner, Adriano Somavilla y Walter Crepaz
Muderazion: David Lardschneider
Chësta manifestazion dl Museum Gherdëina fej pert dl pruiet Ti dé tëmp al tëmp, metù a jì per l ann 2018 dal Servisc furmazion Gherdëina deberieda cun i Cunsëies de furmazion y cun la Lies dla valeda.
