Culezion nueva dla mostres de juesc Sevi

Documentazion dla produzion de juesc de lën te Gherdëina
 
 
Canche la va de chiena, po pënsen riesc ala firma Sevi che ie stata belau per dut l 20ejim secul una dla firmes plu mpurtantes tla produzion de juesc de lën. L Museum Gherdëina possa śën pité na udleda deplën dl lëur dla firma Sevi, de gra a Georg Senoner, ultim patron dla firma, che de auril de chëst'ann à sëurandat duta si culezion de mostres y articuli coche mprëst permanënt. L se trata de feter 8.000 pec cun leprò i dessënies de produzion y d’autri documënc mpurtanc.
 
Davia che la produzion de juesc de lën ne ie per dejeneies nia mé stata na carateristica de Gherdëina, ma nce un di ciamps economics plu mpurtanc dla valeda, ti à l Museum Gherdëina da for dat n gran valor. Bele dal 1968 cunservea l Museum na culezion storica de vedla chiena y dal 1995 nce na prima culezion de juesc dla firma Sevi. I modiei piei do ntlëuta ie di ani dan l 1950, la segonda gran culezion tol ite modiei de duta la scala de produzion di ani dal 1930 al 1998.
 
Per tenì la culezion dla mostres Sevi à l Museum Gherdëina njenià ite n local depot aposta. Tlo vën la arpejon materiela ti proscimi mënsc ejamineda y cataloghiseda y studieda do. Permó daldò sarala da pudëi presenté al publich tres na prima mostra, pra chëla che l ie bele unì fat n gran lëur de stude ti ani passei.
 
L proiet vën sustenì da pert dl Ufize per la Cultura Ladina y di chemuns de Gherdëina.