L Drap dla Pascion da Sacun ie da udëi tl Sachsen

Na reproduzion dl drap de Gherdëina acumpanieiea la mostra dl Gran Drap dla Cuarëisma de Zittau – Vijites menedes tl Museum Gherdëina

Cun l scumenciamënt dl tëmp de Cuarëisma ie l Drap dla Pascion da Sacun da amiré tl Sachsen.

Davia che l uriginel ie belau 400 ani vedl y vën cunservà tl Museum Gherdëina, ie chël che ie śën da udëi tla mostra de giubileo dl gran Drap de Zittau na reproduzion 1:1.

Ntan duta la Cuarëisma pieta l Museum Gherdëina vijites spezieles sun l Drap da Sacun y i dessënies dla majon de Bierjun.

Avisa dan 550 ani univa l gran Drap dla Cuarëisma de Zittau adurvà l prim iede per curì ju l presbitere dla dlieja de St. Johannis. Ncueicundì vën chësc drap cunscidrà coche un di majeri bëns artistics de chësta zità tl sud-ost dl Sachsen. L giubileo an teut a Zittau coche ucajion per mëter ora tla dliejes dla zità y ntëurvia d’autri draps che vën da d’autra regions. Danter chisc iel nce l bel gran Drap dla Pascion da Sacun cunservà tl Museum Gherdëina a Urtijëi. Na copia de chësta gran tëila depënta de Gherdëina tl format 1:1 ie tacheda ora nchin Pasca tla dlieja de Dittelsdorf daujin da Zittau.

La tradizion di draps dla Cuarëisma va ndëur al Medieve. I univa adurvei per curì l presbitere cun si autere. I draps òva nce la funzion de fé da bibia dl popul y ti purtova daujin ala jënt, che n gran pert ne savova mo nia da liejer, la stories dl Vedl y Nuef Testamënt.

L Drap da Sacun ie unì depënt dan avisa 400 ani da n artist nia cunesciù, l ie grant cater per cinch metri y conta te 24 chedri la storia dla pascion, mort y ressurezion de Gejù y fina via cun l avenimënt dla Pasca de Mei.

Nce tl Museum Gherdëina possa i nteressei ntan l tëmp de Cuarëisma jì ite plu sot tla storia faszinënta di Draps, si funzion y senificat, y dantaldut de chël da Sacun.

Uni vënderdi dala cater domesdì vëniel pità na vijita meneda, ulache l unirà nce stlarì i dessënies a crëida cuecena dl 1490 sun l taflà dla majon de Bierjun.
La vijita ie debant, l ie mé da paië l priesc de ntreda. L nen ie nia debujën de se lascé nuté su danora.