13.05.2018
Di nternaziunel di museums
Open day 14-18
14-18Program per families
L teater de Bispul
de Eva Sotriffer tl Museum Gherdëina
Ai 13 de mei, festa dla oma y Di internaziunel di museums iel nce per l Museum Gherdëina stat na ucajion per pité – domesdì, dala 14.00 ala 18.00 – n program deletëul per la families. Da udëi fovel, de plu iedesc ntan dut l domesdì, n teater ritmich de figures per pitli y granc che durova n vint menuc, l “teater de Bispul”.
L pez ie unì pensà ora, metù adum, realisà, nterpretà y purtà dant cun maestria da Eva Sotriffer. Prutagonist dl pez ie Bispul, n mandl o miec na figura de lën furnida, na sort de Casperle, che ie mé n 30 cm grant. L plu gën val ora per l mond cun o sun na fiertla da banch. Coche i vedli marcadënc de Gherdëina. O coche i jugulieres da zacan che jiva ncantëur da n luech al auter cun si orghen y vel’ tier – n’afa o na lores o croc o vel’ ucel – a purté dant si spassëtli y purté mpue de aurela curta. Ma n dumënia domesdì se à Bispul fermà te Gherdëina.
Cun ardimënt ti val permez al’acuntedes plu defrëntes y l vega n viac d‘aventures tres l tëmp. L’ancunteda plu da temei, ma nce plu da marueia ie chëla cun l itiosaur de Secëda. Ël vën da tëmps da giut passei, ma de chëi che la fusties ie mo da udëi y da amiré te nosta bela cuntreda da mont y sambën nce ti reperc paleontologics tl Museum Gherdëina. Cun Bispul y l itiosaur arsions tl sot de chi tëmps, te ciei y meres y crëps criei te milions d’ani da snec y corai y cunchilies y vestri vivënc che ne cunescion plu.
Cun gran fantasia y fortl nes à Eva Sotriffer menà tl tëmp dla junëza de nosta tiera nes lascian reviver cun magia y poejia la furmazion de nosta bela montes. La ispirazion per si reprejentazion àla tëut dala culezions dl museum nstës, dai curëc y fossii, ma nce dal’arpejon y dala tradizion artejanela y artistica de Gherdëina – dala figures de lën, dala chiena, da operes d’ert coche p.ej. l cheder dl de bera Sepl da Jumbierch.
Cun l teater de Bispul, tan scëmpl y poetich a ti cialé, y mpò – bonamënter – tan cumples te si realisazion, ti à Eva Sotriffer sapù scicnché a pitli y granc na emozion y ligrëza.
L à fat plajëi che truepa families jëunes cun mutons se à nuzà dl di dla porta davierta, per unì a ti cialé al Museum de Gherdëina y al pitl teater drët senificatif de Eva Sotriffer. La manifestazion ie oradechël unida sustenida tres l proiet di Cunsëies de Furmazion ”Ti dé tëmp al tëmp“.
Ingrid Runggaldier
Download Poster
Mëisa de cunversazion sun i mejes de Gherdëina
