Plates de platin per “Flashdance“ de Giorgio Moroder tl Museum

La mujiga dl film “Flashdance“ ie stata l majer suzes de Giorgio Moroder. N simbul de chësc suzes ie unit sëurandat dal autëur de mujiga, composidëur y pionier dla disco music al Museum Gherdëina a Urtijëi, ulache ël ie nasciù: Giorgio Moroder à nfati dat 13 plates de platin al Museum, che ël à giapà n recunescënza per avëi vendù 13 milions de albums de “Flashdance“.

Chësta dunazion straurdinera à Giorgio Moroder fat al Museum Gherdëina l’ena passeda: 13 plates de platin venciudes per Flashdance.
“La mujiga per l film Flashdance cun l hit What a feeling ie stat mi majer suzes, cun chël che tl 1984 ei venciù l segondo de mi trëi Oscar y che me à fat cunescer mo deplu tl’America”, à dit Giorgio Moroder n ucajion dla sëurandata dla plates.
Chësta 13 plates de platin ie perchël la miëura testemunianza dl suzes mundiel dl composidëur de Gherdëina. Ma nia mé, la plates representea nce n prim var de na culaburazion danter Giorgio Moroder y l Museum Gherdëina: l componist à dit de ulëi slargé si culezion cun mo d’autri premi y lecurdanzes senificatives de si cariera musichela canche l museum arà na majera lerch espositiva da pudëi ti dediché.
L presidënt dl Museum Gherdëina Wolfgang Moroder à sotrissà l valor unich dla dunazion che ie n gran unëur y arichimënt nia mé per l Museum ma per duta la valeda: “L ie l prim var per pudëi cunté y mustré su tres n proiet da realisé deberieda tl daunì cieche Giorgio à fat y representea per la storia dla mujiga”, à dit l presidënt dl museum, che à sëurandat a Giorgio Moroder coche sëni de rengraziamënt y recunescënza la medaia d’arjënt dl Museum y la uneranza de cumëmber d’unëur.
La plates de platin per “Flashdance“ ie metudes ora tl Museum Gherdëina n ucajion dl cunzert de Giorgio Moroder ai 12 agosto sun plaza Sant’Antone a Urtijëi y resterà da udëi nchin de utober.