Stories de vita y cianties d’Avënt

Lecurdanzes dl’nfanzia sun n mesc, stories da rì y da pensé do

Danterite cianta l "Trio dl’ëiles de Gherdëina" cun Otto Dellago
vënderdi, ai 6 de dezëmber 2019, dala 16:00
tla Cësa de Cultura a Urtijëi, sala mostra MEJES
L’entreda ie debant!

Mejes – Stories de vita y cianties d'Avënt

Descedè ora nteres y ntujiasmé per la belëza y l valor di mejes storics: chësc fova (y ie) l travert che l Museum Gherdëina se à metù dant cun l proiet "Mejes – La memoria de na cuntreda". Sën, dal tëmp d’Avënt inant ie la mostra "Mejes" tla Cësa de Cultura davierta uni di ora dl lunesc. Sëurapro vëniel pità na promozion per l liber cun la fotografies artistiches di mejes de duta Gherdëina. L tëmp da d’inviern vën nvià via ai 6 de dezëmber cun stories de vita y lecurdanzes de persones che à vivù sun n mesc te Gherdëina, cun atmosfera musichela.

Esperienzes de vita sun n mesc

D’inviern cun frëit y nëif paussòva l lëur tl ciamp y la vita da paur se cunzentrova inò deplù te cësa. L bestiam fova desmuntà, l fova da cuncé su la massaria y fé dautri lëures sul luech. L mur de stua cun si bon ciaut fova d’inviern l patron dla cësa. Gën stajovun a paussé sun banch da furnel y se la cunté, a filé o a ziplé nchin tert da sëira n cumpania cun d’autri. Stories y tradizions univa nsci purtedes inant.

Per l tëmp d’Avënt à l Museum Gherdëina nvià ite deplù persones a cunté tla Cësa de Cultura n vënderdi, ai 6 de dezëmber dala 4 domesdi, de si esperienzes de vita, si nfanzia y autra ntraunides sun n mesc. De coche l fova a viver su sun n luech da paur te Gherdëina, cieche n fajova d’inviern via y coche n se njeniova ca ala ueia da Nadel. L sarà da audì stories che fesc pensé do, ma nce stories plëines de bon humor y da se la rì.

Tres l domesdi menerà Vinzenz Senoner de Fussel.

Danterite cianterà l "Trio dl’ëiles de Gherdëina" acumpanià da Otto Dellago.
L’ntreda ie debant!

Fotografies y valor di Mejes

Mo na segonda azion vën piteda dal Museum Gherdëina ntan l tëmp d’Avënt. L liber “Mejes de Gherdëina – La memoria de na cuntreda” ie da pudëi giapé a n bon priesc. Leprò giapen mo na cherta d’entreda dl Museum a Urtijëi da scinché pea.
L liber cun la nueva imajes a blanch y fosch di mejes cris su te duta la valeda ti ultims mënsc dal fotograf de architetura Vaclav Sedy fej fej luné ora la belëza y richëza architetonica, costrutiva y estetica particulera di mejes de Gherdëina. Chësta fotografies de cualità artistica mpermënt n azes visif y emoziunel y nce n confront analitich cun la frabiches che à per cënc d’ani caraterisà la storia dla valeda.
Tl medemo mumënt mostra la fotografies de Sedy nce la vulnerabilità de chisc frabicac, che vën a mancë uni ann for deplù pervia dla trasfurmazions economiches y sozieles.
Sëurapro ala fotografies iel tl liber cuntribuc di autores Annibale Salsa y Alberto Grimoldi, esperc de cultura alpina y dla scunanza di monumënc culturei. L storich Jossef Nössing pieta n cheder dl scumenciamënt dl nridalmënt te Gherdëina y dla cultura materiela da paur dan 400 ani. L architët Wolfgang Klebeslberg spiega l’impurtanza de mejes per la memoria storica de na cuntreda y Paulina Moroder, diretëura dl Museum Gherdëina, auza nfin ora la richëza (nia mé architetonica) dla vedla cëses da paur y si tublëi.

Cun si passa 200 imajes de 71 mejes storics dla valeda representea l liber nuef na documentazion fotografica de valor de n capitul de storia dla cultura y identità de Gherdëina de chëla che i mejes “ie n simbul chiet y suprem”, coche à scrit l fotograf Vaclav Sedy.

Ultima fasa dla mostra

Liber y mostra ie nchinamo unic tëuc su cun gran nteres dal publich. Tl liber di vijitadëures possun liejer do no mé pensieres dl dut positives sun la iniziativa ma nce l desidèr de trueps che i mejes posse se mantenì y svilupé inant nce tl daunì.

La mostra “Mejes de Gherdëina”, che ie da udëi dai primes de agost inant tla Cësa de Cultura a Urtijëi, va sën ite te si ultima fasa dan che la unirà dl 2020 mandeda ncantëur oradecà.

Orars de giaurida nchin ala fin de jené: dal merdi ala dumënia, for dala 15 ala 18, sada y dumënia nce danmesdi dala 10 ala 12. L liberi e da pudëi cumpré sibe tla mostra tla Cësa de Cultura che nce tl Museum tla Cësa di Ladins.

Per deplù nfurmazions:
Dr. Paulina Moroder
Diretëura dl Museum Gherdëina
Tel. +39 338 6040477
E-mail: p.moroder@museumgherdeina.it