Ëiles de Gherdëina tl’ert dl ziplé

(6a pert)
 
Do chësta ultima cin' edizions ons abù na bona resunanza da pert de trueps che ti sta a cuer l argumënt, te chël che on ulù sorissé la mpurtanza dl'ëiles tl ert dl ziplé te Gherdëina y scrì n capitul nuef dla storia de Gherdëina.
Duta la cuntedes n con' dl'ëiles che zipla ie da pudëi liejer do tlo:
1a pert
2a pert
3a pert
4a pert
5a pert
 
Te chësta sesta edizion jons inant cun l'ëiles che à ziplà crisć te si vita. Do la trëi zipladësses de crisć che ve on bele prejentà, ulons chëst iede lecurdé trëi landes che ne n'ie nia plu n vita, nasciudes danter l 1899 y l 1921.
 

---

 

Elisabeth Planker Santifaller da Banch

 
ziplova crisć sa Sacun
Nasciuda a Urtijëi ora l Grien tl 1899, fova anda Lisabeta la plu vedla dla familia da cin' mutans y un n mut. Mparà a ziplé òvela da si pere Giuani che ziplova crisć. L fra de Lisabeta, Giuani y la surans Maria y Zisca Planker ziplova ënghe crisć ora l Grien.
Cun 22 ani se òvela maridà cun Cristl Santifaller da Banch sa Sacun.
Bera Vigil Pescosta, che fova n badiot y cunesciù coche scialdi n bon scultëur, stajova tla medema cësa via delà, ël fova maridà cun Śefa Peristi da Banch. Bera Vigil jiva unitant via da d'ëila te stua y ti mustrova nce vel' iede co ziplé.
Anda Lisabeta à ziplà duta la vita crisć. Zopes de crisć, da de tei pitli sun la crëujes de 3-4 cm, a de majeri de 12, 15 y 20 cm. La tulova n tòch de lën de zirm y scumenciova a desmazé, la ziplova zënza model no nia, dut adamënz, i fova nce duc medemi, un sciche l auter.
Si uem Cristl ti fajova la crëujes.
Elsa, la fia, mandovi a vënder ta Pigon cun n fazulët plën de pitli crisć, sambën a pe, ite y ora, scioldi ne n giapòvela deguni, ma n bon per cumpré ite roba da maië te chëla medema butëiga.
N tel pitl berba de Soplajes, che stajova sot a Ciopa y se tlamova Otto Senoner (vulgo l gobo de Socrëp), jiva uni un o doi mënsc da anda Lisabeta a se tò crisć, po' rumòvel mé ite duc chëi che la ova finà te flucion, ti paiova riesc duta la marcanzia y n apustova inò per l iede do.
 
 
 

Emma Prinoth da Pescosta, Urtijëi

 
ova mparà a ziplé da Maria Fill
Anda Emma ie nasciuda ai 18 de nuvëmber dl 1916 ta Pescosta.
Cun 14 ani àla scumencià a ziplé tla berstot de anda Maria Senoner marideda Fill, scultëura y mòstra. A chësta scultëura de crisć ti dedicherons plu inant na nrescida a pert per la mpurtanza che la à abù tl ciamp dl'ert religëusa.
Tl 1941 ie la jëuna Emma ruveda ora i Tudësc, tl Oberammergau, ulache la à mparà tudësch. La fova unida cherdeda ntan l tëmp de viera a fé miscion de viera (Kriegseinsatzdienst), ëila ziplova proteses a ch'i puere saudeies che ova perdù na giama o n brac.
Riesc do la viera àla cunesciù si uem Karl Holzschuh, che fova perjunier de viera di americans.
L viver se trajovi n gran pert cun l ziplé de Emma. La ziplova figures, tieres, ma dantaldut motifs religëusc y la à ziplà nchin al'età de 80 ani.
Emma à abù n mut, Robert che ie nasciù a Minca tl 1954. True' massa abenëura àla perdù si uem, la ie resteda vëidua che la ova mé 54 ani.
Chësta nfurmazions éi giapà da Leni Runggaldier da Pescosta, che à tenì su la storia de vita scrita dal pluan de Weilbach, ulache Emma à vivù cun si mut nchin che la ie morta cun 96 ani, ai 26 de nuvëmber dl 2012.
Sun l nserat da mort tla zaites fòvel scrit: "Herrgottschnitzerin".
 
 
 

Mariele Kostner dla Rodera marideda Alfarei

 
à mparà a fé crisć da bera Hermann Grossrubatscher da Larenzan
Anda Mariele univa ora de na gran familia, ëila ie nasciuda tl 1921 coche 13ejima fia, jumblina cun Batista "Tischta" y stajova tla raida dla Rodra a jì sun Ch'l Piz a Urtijëi.
Canche Mariele ova sies ani, tl 1927, ie si oma Johanna Sotriffer de Val morta de pert pra l 17ejim pop y la ova mé 42 ani. Chël ie stat n gran spavënt!
Finei i ani de scola ti ova l pere dit: "Tu es na bona man y te ies na bona de dessenië, tu va mé te berstot a ziplé." L'autra surans ntantsce messova jì sun la stieres, a fé la fanceles ajache scioldi n fòvel da mat puec te familia.
Mariele ova pona pudù jì a mparé a ziplé crisć da bera Hermann Grossrubatscher da Larenzan. L moster la ova dassënn gën y ëila mparova aslune. A sté cun blo' ëi te berstot òvela nce mparà a se deriejer drët bën y a se paré. La savova for da n cunté una da rì y la ova for la "battuta pronta" y a deguni ne ti restòvela debit na resposta daulëibon.
Che la fova mpareda ora àla scumencià a ziplé a cësa tla berstot de familia cun l pere Ferdinand y si fredesc Ferdinand, Willi y Luis.
L fova scialdi da lëur te chëi ani y ëila ziplova si crisć da fonz ora, la fova bona y asvelta.
Mariele ova mparà a fé crisć jan damprovia nsci:
tl prim unìvel dessenià sun n carton la forma dl corp dl crist, da dedò cupià sun n tapl de lën de zirm y cun n boter unìvel desmazà ntëurjù. Pona unìvel ziplà n iede l corp y i braces a pert, chisc univa nculei su cun broces de lën. Ala fin unìvel mo sentà ite i tlauc y metù su la tofla cun la scrita INRI. Ëila ziplova crisć da 20 cm nchin a 35 cm y uniun giapova si crëusc aldò dla mesura.

Do che la se ova maridà tl 1954 cun Paul Alfarei da Passua, ti siova ora si uem l plu gros cun la sia a vëta, nsci òvela bele n gran lëur de manco. Bera Paul ziplova urnamënc y tramedoi laurova deberieda te berstot, ël ti judova a fé la crëujes y les ziplova ora canche l jiva de bujën. La fia Olimpia se lecorda che l ti savova for tan bel, canche la ruvova da scola, a jì ju te berstot pra d'ëi y sentì l bon tof da lën de zirm.
"Chëla puscibltà ne n'à truep jëuni nia plu al didancuei de pudëi sté te berstot y avëi si mutons pra sé," dij Olimpia, "la umans y i peresc ie suvënz demez a lauré."
Olimpia se lecorda che si oma à for ziplà, ti ani àla nce ziplà do crisć ju de mascin che l fova unit manco da lëur, ma chël àla pa tosc lascià che l ne ti savova nia bel y l ne ti dajova deguna sudesfazion.
Morta iela ai 31 de setëmber dl 2011 che la ova 95 ani.
(Nfurmazion dla fia Olimpia Alfarei d'instà dl 2021)
 
 

---

 
Do che l ie unì publicà per l prim iede la ntervistes sun l’ëiles tl ert dl ziplé à truepa d’autra ëiles y ëi desmustrà gran nteres per chësc argumënt. Ulësse perchël ti sentì de gra de cuer a duta cantes y duc canc per si testemunianzes de valor!
 
La ntervistes y la biografies ie unides publichedes do y do sun la plata WEB dl Museum Gherdëina (www.museumgherdeina.it) y tla zaita la Usc di Ladins.
 
Chiche ulëssa mo dé vel’ nfurmazion, possa gën nes cherdé su al numer de telefonn: 0471 797554 o scrì na email a: info@museumgherdeina.it
 
Per l Museum Gherdëina,
Monika Kelder